Markmið rannsóknarinnar sem hér er kynnt var að orðræðugreina umræður starfsfólks leikskóla á Facebook á Covid-tímanum, umræður sem spruttu upp í kjölfar a) ákvarðana stjórnvalda um skólastarf og b) opinberrar umfjöllunar um leikskóla. Tilgangurinn var að greina upplifun starfsfólks með því að rýna í orðanotkun, hugtök, lýsingar og myndlíkingar. Niðurstöður sýna vissa þversögn; margt starfsfólk óttaðist að smitast og var kvíðið en var um leið stolt af því að geta lagt hönd á plóg fyrir samfélagið á erfiðum tímum. Þrástefin í umræðunni voru fjögur; ótti starfsfólks við að smitast í vinnunni, upplifun af vanþekkingu stjórnvalda á starfsemi leikskóla, virðingarleysi við starfsemi leikskóla og virðingarleysi við starfsfólk leikskóla. Þegar leið á Covid-tímann má greina að innlegg urðu almennt beinskeyttari og lýstu mörg þreytu, sárindum og jafnvel uppgjöf en þarna var líka hópur sem hélt í jákvæðni út tímabilið. Draga má þá ályktun að stjórnvöld hefðu getað gert betur í ákvörðunum sem snertu leikskóla á Covid-tímanum og af því má draga lærdóm til framtíðar.
Höfundur: Anna Elísa Hreiðarsdóttir
Efnisorð: leikskóli, starfsfólk leikskóla, menntahlutverk leikskóla, Covid
Doi númer: https://doi.org/10.24270/tuuom.2026.35.3
